Для чалавека вельмі важна не толькі дыхаць родным паветрам, любавацца цёплым сонейкам, але і адчуваць сябе часцінкай Радзімы, яе гісторыі і культуры, традыцый продкаў. Народная мудрасць сведчыць: калі не ведаеш, адкуль прыйшоў, то не ведаеш, куды пойдзеш.
Супрацоўнікі Валожынскага краязнаўчага музея разумеюць, што выхоўваць сапраўдных патрыётаў нашай Радзімы праз традыцыі і добрыя справы продкаў патрэбна з ранняга дзяцінства. Раз у месяц вучні 2-іх класаў гімназіі №1 г. Валожына з гуртка “Маладзічок” наведваюць нашу ўстанову. Цікава і пазнавальна прайшоў чарговы занятак, які быў прысвечаны ганчарству - найважнейшаму занятку нашых продкаў: вытворчасці вырабаў з гліны гаспадарчага і дэкаратыўна-прыкладнога прызначэння.
Навуковы супрацоўнік музея Васільева Т.А. расказала дзецям аб гісторыі промысла, паказала відэасюжэт аб івянецкіх ганчарах і мультфільм па тэме “Як Несцерка скарб знайшоў”, пазнаёміла з гліняным посудам, які знаходзіцца ў экспазіцыі “Беларускай хатка”. Таццяна Аляксандраўна і кіраўнік гуртка Таўгень Л.С. прадставілі дзецям гліняныя цацкі – свістулькі, на якіх вучні змаглі сыграць прасцейшыя найгрышы.