Міністэрства культуры Рэспублікі Беларусь
Дзяржаўны літаратурна-мемарыяльны музей Якуба Коласа
Кінашкола Андрэя Палупанава
Рэспубліканская гімназія-каледж пры Беларускай дзяржаўнай акадэміі музыкі
Прэс-рэліз
Літаратурна-музычная праграма “Капітан дзіцячых мараў”
11 мая ў 14. 00 у Дзяржаўным літаратурна-мемарыяльным музеі Якуба Коласа адбудзецца літаратурна-музычная імпрэза “Капітан дзіцячых мараў”, прысвечаная дню нараджэння Янкі Маўра.
“Бацька беларускай дзіцячай літаратуры”, “беларускі Жуль Верн”, “капітан дзіцячых падарожжаў”, “чалавек з крылатай фантазіяй” – так гавораць пра вядомага айчыннага пісьменніка Янку Маўра, дзень нараджння якога адзначаецца ў маі. Янка Маўр – аўтар апавяданняў, аповесцяў і раманаў для дзяцей і моладзі, адзін з заснавальнікаў беларускай дзіцячай літаратуры, пачынальнік прыгодніцкага і навукова-пазнавальнага жанраў, стваральнік першай айчыннай навукова-фантастычнай аповесці.
Янка Маўр знаходзіўся ў сяброўскіх адносінах з класікам беларускай літаратуры Якубам Коласам. Абодва вучыліся ў настаўніцкіх семінарыях (дзе таксама атрымалі і музычную адукацыю). Абодва ўдзельнічалі ў настаўніцкім з'ездзе (дзе і пазнаёміліся) у 1906 годзе, пасля якога Якуб Колас быў асуджаны і адпраўлены ў астрог, а Янка Маўр (тады яшчэ Іван Фёдараў) аддадзены пад нагляд паліцыі і пазбаўлены права выкладаць у школе. У гады вайны сям'я Янкі Маўра знаходзілася ў Алма-Аце, пісьменнік вёў сяброўскае ліставанне з Якубам Коласам, які ў гады эвакуацыі жыў у Ташкенце. Цікава, што Маўр стаў правобразам настаўніка Івана Тадорыка з трылогіі Я. Коласа “На ростанях”. Пісьменнікі сталі сваякамі: дачка Янкі Маўра Наталля выйшла замуж за сына Якуба Коласа Міхася. Наталля Іванаўна і Міхась Канстанцінавіч былі разам амаль 65 гадоў. Разам працавалі над кнігай успамінаў Наталлі Міцкевіч “Доўгая дарога ад дома Янкі Маўра да дома Якуба Коласа”.
11 мая ў імпрэзе “Капітан дзіцячых мараў” возьмуць удзел родныя Якуба Коласа і Янкі Маўра, адбудзецца прэм’ерны паказ літаратурна-музычнага прадстаўлення “Палескія рабінзоны” з удзелам вучняў кінашколы Андрэя Палупанава і навучэнцаў Рэспубліканскай гімназіі-каледжа пры Беларускай дзяржаўнай акадэміі музыкі.
Сардэчна запрашаем!
Кантактны тэлефон: (017) 270 17 02
Адрас: г. Мінск, вул. Акадэмічная, 5
www.kolasmuseum.by; e-mail: info@kolasmuseum.by
